అయ్యప్ప స్వామి ఆలయంలో ఉండే ఈ 18 మెట్లు ఎక్కడం ఎంతో పుణ్యంగా భావిస్తారు. నాలుగు వేదాలు, రెండు శాస్త్రాలు, అష్ట దిక్పాలకులు, విద్య, అవిద్య, జ్ఞానం, అజ్ఞానానికి రూపమైన దేవతా మూర్తులు పద్దెనిమిది మెట్లుగా ఏర్పడి అయ్యప్పను దర్శించుకునేందుకు భక్తులకు సహాయపడతారని చెబుతారు. ఈ పద్దెనిమిది మెట్లకు పద్దెనిమిది పేర్లు ఉన్నాయి. మండల కాల దీక్ష చేపట్టి కఠోరమైన ఉపవాసం ఆచరించిన వ్యక్తి మాత్రమే ఈ పద్దెనిమిది మెట్లు ఎక్కేందుకు అర్హులుగా ఉంటారు. స్వామి తల మీద ఇరుముడి పెట్టుకుని మెట్లు ఎక్కుతారు.
