ఒకే టైటిల్ తో రెండు సినిమాలు రావడం సహజం. కానీ ఒకే పరిశ్రమకు చెందిన ఇద్దరు హీరోలు.. ఒకే రోజు, ఒక టైటిల్ ను ప్రకటించడం, పైగా ఆ ఇద్దరికీ అది 25వ సినిమా కావడం అనేది అత్యంత అరుదుగా జరుగుతుంది. తాజాగా తమిళ హీరోలు శివకార్తికేయన్, విజయ్ ఆంటోనీ విషయంలో అదే జరిగింది. (Parasakthi)
శివకార్తికేయన్ తన 25వ సినిమాని సుధా కొంగర దర్శకత్వంలో చేస్తున్నాడు. ఈ చిత్రానికి ‘పరాశక్తి’ అనే టైటిల్ ను ప్రకటిస్తూ.. తాజాగా టైటిల్ టీజర్ ను విడుదల చేశారు. అంతేకాదు, తెలుగులోనూ ఈ సినిమాని ‘పరాశక్తి’ టైటిల్ తోనే విడుదల చేయనున్నట్లు స్పష్టం చేశారు. అయితే ఇదే టైటిల్ ను విజయ్ ఆంటోనీ సైతం తన కొత్త చిత్రానికి ప్రకటించడం ఆసక్తికరంగా మారింది.
అరుణ్ ప్రభు డైరెక్షన్ లో విజయ్ ఆంటోనీ తన 25వ సినిమాని చేస్తున్నాడు. తమిళ్ లో ఈ సినిమా ‘శక్తి తిరుమగన్’ పేరుతో రూపొందుతోంది. అయితే తెలుగులో ఈ చిత్రాన్ని ‘పరాశక్తి’ పేరుతో విడుదల చేయనున్నట్లు తాజాగా ప్రకటించారు.
ఇలా ఇద్దరు హీరోలు తమ 25వ సినిమా టైటిల్ ‘పరాశక్తి’ అని ఒకేరోజు అనౌన్స్ చేశారు. శివకార్తికేయన్ సినిమాకి తెలుగు తమిళ భాషల్లో ఒకే టైటిల్ కాగా, విజయ్ ఆంటోనీ సినిమాకి మాత్రం తెలుగులో ఆ టైటిల్ ను ప్రకటించారు. మరి ఈ టైటిల్ కోసం రెండు టీమ్స్ మధ్య వివాదం నెలకొంటుందో లేక తన తోటి తమిళ హీరో కోసం విజయ్ ఆంటోనీ తన తెలుగు టైటిల్ ను మార్చుకుంటాడో చూడాలి.
