97వ అకాడమీ అవార్డుల ఉతవాన్ని ఘనంగా నిర్వహించేందుకు అన్ని ఏర్పాట్లు జరుగుతున్నాయి. ఇప్పటికే అవార్డుల ఎంపిక ప్రక్రియ ఓ కొలిక్కి వచ్చినట్టు తెలుస్తోంది. ప్రపంచ దేశాలకు సంబంధించిన ఎన్నో భాషా చిత్రాలు ఆస్కార్‌ పోటీకి వందల సంఖ్యలో సినిమాలు వచ్చాయి. వాటిని వడపోసే కార్యక్రమం చివరి దశకు చేరుకుంది. వీటిలో హాలీవుడ్‌ చిత్రం ‘కాంక్లేవ్‌’ ఏకంగా 8 నామినేషన్లలో ఉండడం విశేషం. ఈ చిత్రం ఎనిమిది విభాగాల్లో నామినేషన్‌ పొందింది. బెస్ట్‌ పిక్చర్‌, బెస్ట్‌ యాక్టర్‌, బెస్ట్‌ సపోర్టింగ్‌ యాక్ట్రెస్‌, బెస్ట్‌ కాస్ట్యూమ్స్‌, ఒరిజినల్‌ స్కోర్‌, అడాప్టెడ్‌ స్క్రీన్‌ప్లే, ఎడిటింగ్‌, ప్రొడక్షన్‌ డిజైన్‌ వంటి విభాగాల్లో ‘కాంక్లేవ్‌’ చిత్రం అవార్డులు సాధిస్తుందనే టాక్‌ వినిపిస్తోంది. గతంలో ఎలా ఉన్నా ఈమధ్యకాలంలో ఒక సినిమా ఇన్ని నామినేషన్స్‌ పొందడం అందర్నీ ఆశ్చర్యపరచింది. ఇప్పుడు అందరి దృష్టీ ఈ సినిమాపైనే ఉంది.
పోటీకి వచ్చిన సినిమాలను వడపోసిన తర్వాత ఫైనల్‌ ఓటింగ్‌ ఉంటుంది. ఫిబ్రవరి 11న ఈ ఓటింగ్‌ ప్రారంభమై, ఫిబ్రవరి 18న ముగుస్తుంది. మార్చి 2న ఆస్కార్‌ అవార్డుల ఫంక్షన్‌ జరుగుతుంది. ఆ తర్వాత ఏప్రిల్‌ 29న సైంటిఫిక్‌, టెక్నికల్‌ అవార్డులను ప్రదానం చేస్తారు. ప్రపంచ దేశాలలోని సినిమా రంగాలకు ఆస్కార్‌ అనేది ఒక గొప్ప అఛీవ్‌మెంట్‌. దాన్ని సాధించడమే లక్ష్యంగా ఎంతో మంది కృషి చేస్తుంటారు. ఎన్నో సంవత్సరాల నిరీక్షణ తర్వాత 2009లో ఎ.ఆర్‌.రెహమాన్‌ ఆ కలను నిజం చేశాడు. స్లమ్‌డాగ్‌ మిలియనీర్‌ చిత్రంలోని ‘జైహో’ పాటకు ఒరిజినల్‌ సాంగ్‌ విభాగంలో రెహమాన్‌కు ఆస్కార్‌ అవార్డు లభించింది. 2023లో తెలుగు సినిమాకి ఆ అదృష్టం దక్కింది. ఎన్టీఆర్‌, రామ్‌చరణ్‌ హీరోలుగా ఎస్‌.ఎస్‌.రాజమౌళి దర్శకత్వంలో తెరకెక్కిన ‘ఆర్‌ఆర్‌ఆర్‌’ చిత్రంలోని ‘నాటు నాటు’ అనే పాట ఒరిజినల్‌ సాంగ్‌ విభాగంలో ఆస్కార్‌ అవార్డు సాధించింది.
ఇప్పుడు అందరి దృష్టినీ ఆకర్షిస్తున్న ‘కాంక్లేవ్‌’ చిత్రం అక్టోబర్‌ 25న అమెరికాలో, నవంబర్‌ 29న యు.కె.లో విడుదలై సంచలన విజయం సాధించింది. 20 మిలియన్‌ డాలర్ల బడ్జెట్‌తో నిర్మించిన ఈ సినిమా 80 మిలియన్‌ డాలర్లు కలెక్ట్‌ చేసింది. ఫిబ్రవరి 7న ఈ సినిమా ఇండియాలో కూడా రిలీజ్‌ కాబోతోంది. కథ విషయానికి వస్తే.. పోప్‌ ఎన్నికకు సంబంధించిన కథాంశంతో రాబర్ట్‌ హ్యారిస్‌ 2016లో ప్రచురించిన కాంక్లేవ్‌ అనే నవల ఆధారంగా ఈ చిత్రాన్ని నిర్మించారు. కొత్త పోప్‌ను ఎన్నుకునే ప్రక్రియలోని సభ్యులను కాంక్లేవ్‌ అంటారు. ఈ కథాంశం పోప్‌ జాన్‌ పాల్‌2 మరణించిన తర్వాత జరిగిన పోప్‌ ఎన్నిక గుర్తుకు తెస్తుంది. ప్రత్యేకించి 2005లో పోప్‌ జాన్‌ పాల్‌ మరణించిన తర్వాత తదుపరి పోప్‌ ఎన్నిక అనేది ప్రపంచమంతా చర్చనీయాంశంగా మారింది. అయితే అది ఈ సినిమాకి సంబంధం లేదని, కేవలం ఇది ఒక థ్రిల్లర్‌ మూవీ అని చెబుతున్నారు. ఈ సినిమాకి ఇన్ని ప్రత్యేకతలు ఉన్న కారణంగా మార్చి 2న ఏం జరగబోతోంది అనే క్యూరియాసిటీ అందరిలోనూ ఉంది.
