Saudi Arabia accident: పశ్చిమ సౌదీ అరేబియాలోని జిజాన్ సమీపంలో బుధవారం జరిగిన రోడ్డు ప్రమాదంలో తొమ్మిది మంది భారతీయులు సహా 15 మంది దుర్మరణం పాలయ్యారు. భారతీయుల్లో తెలంగాణలోని జగిత్యాల జిల్లాకు చెందిన వ్యక్తి కూడా ఉన్నారు. జెడ్డాలోని భారత రాయబార కార్యాలయం ఈ సమాచారాన్ని వెల్లడించింది. ‘‘సౌదీ అరేబియా పశ్చిమ ప్రాంతంలోని జిజాన్ సమీపంలో జరిగిన రోడ్డు ప్రమాదంలో 9 మంది భారతీయులు మృతి చెందడం పట్ల తీవ్ర దిగ్భ్రాంతి వ్యక్తం చేస్తున్నాం. బాధిత కుటుంబాలకు మా ప్రగాఢ సానుభూతి తెలియజేస్తున్నాం’’ అని భారత రాయబార కార్యాలయం ఎక్స్ లో పోస్ట్ చేసింది. బాధిత కుటుంబాలకు పూర్తి సహాయ సహకారాలు అందిస్తున్నామని, అధికారులు, కుటుంబాలతో టచ్ లో ఉన్నామని తెలిపింది. బాధిత కుటుంబాల కోసం కాన్సులేట్ హెల్ప్ లైన్ నంబర్లు – 8002440003(టోల్ ఫ్రీ), 0122614093-0126614276- 0556122301 (వాట్సప్) కూడా విడుదల చేసింది.
