టాలీవుడ్ లో నెగటివ్ సెంటిమెంట్ లను బ్రేక్ చేసే హీరోగా జూనియర్ ఎన్టీఆర్ (Jr NTR) కు ప్రత్యేక పేరుంది. ఫ్లాప్ లో ఉన్న డైరెక్టర్ కి హిట్ ఇవ్వడం అనేది ఎన్టీఆర్ కి కొన్నేళ్లుగా ఆనవాయితీగా వస్తుంది. 2015 లో వచ్చిన ‘టెంపర్’ మొదలుకొని గతేడాది వచ్చిన ‘దేవర’ వరకు పలువురు ఫ్లాప్ దర్శకులకు హిట్స్ ఇచ్చాడు ఎన్టీఆర్. అలాగే రాజమౌళితో సినిమా చేసిన హీరో.. తన తదుపరి సినిమాతో ఫ్లాప్ అందుకుంటాడనే సెంటిమెంట్ రెండు దశాబ్దాలకు పైగా ఉంది. ఆ సెంటిమెంట్ ను కూడా ‘దేవర’తో బ్రేక్ చేశాడు ఎన్టీఆర్. ఇక ఇప్పుడు మరో నెగటివ్ సెంటిమెంట్ ను బ్రేక్ చేయడానికి సిద్ధమవుతున్నాడు.
తమిళ దర్శకుడితో తెలుగు హీరో సినిమా చేస్తే ఫ్లాప్ అనే నెగటివ్ సెంటిమెంట్ కొన్నేళ్లుగా నడుస్తోంది. ఇటీవల శంకర్ డైరెక్షన్ లో రామ్ చరణ్ ‘గేమ్ ఛేంజర్’ చేయగా అది పరాజయం పాలైంది. అంతకుముందు సముద్రఖని దర్శకత్వంలో పవన్ కళ్యాణ్ ‘బ్రో’, మురగదాస్ దర్శకత్వంలో మహేష్ బాబు ‘స్పైడర్’ చేయగా.. వాటి ఫలితాలు ఏమయ్యాయో తెలిసిందే. అలాగే లింగుస్వామితో ‘ది వారియర్’ చేసి రామ్, వెంకట్ ప్రభుతో ‘కస్టడీ’ చేసి నాగ చైతన్య ఫ్లాప్స్ అందుకున్నారు. ఇలా తమిళ్ డైరెక్టర్స్ తో సినిమాలు చేసి కొన్నేళ్లుగా తెలుగు హీరోలు ఫ్లాప్స్ అందుకుంటున్నారు. ఇప్పుడు ఆ సెంటిమెంట్ ని కూడా ఎన్టీఆర్ బ్రేక్ చేస్తాడా అనేది ఆసక్తికరంగా మారింది.
ఇటీవల ‘దేవర’తో అలరించిన ఎన్టీఆర్.. ప్రస్తుతం బాలీవుడ్ ఫిల్మ్ ‘వార్-2’తో పాటు, ప్రశాంత్ నీల్ డైరెక్షన్ లో ‘డ్రాగన్’ మూవీ చేస్తున్నాడు. వీటి తర్వాత కోలీవుడ్ డైరెక్టర్ నెల్సన్ దిలీప్ కుమార్ తో ఓ సినిమా చేయనున్నాడు. ఈ క్రేజీ ప్రాజెక్ట్ ను సితార ఎంటర్టైన్మెంట్స్ నిర్మించనుంది. ఇప్పటికే నిర్మాత నాగవంశీ కూడా ఎన్టీఆర్-నెల్సన్ కాంబినేషన్ లో సినిమా ఉంటుందని క్లారిటీ ఇచ్చేశారు. ఇక ఇప్పుడు ఈ సినిమాకి సంబంధించి క్రేజీ న్యూస్ వినిపిస్తోంది. ప్రస్తుతం ‘జైలర్-2’తో బిజీగా ఉన్న నెల్సన్.. ఆ తర్వాత చేయనున్న ఇమీడియట్ ప్రాజెక్ట్ ఎన్టీఆర్ తోనే అని సమాచారం. అంతేకాదు ఎన్టీఆర్ పుట్టినరోజు సందర్భంగా మే 20న ఈ మూవీని అధికారికంగా ప్రకటించనున్నారని వినికిడి.
మొత్తానికి తమిళ డైరెక్టర్ నెల్సన్ తో ఎన్టీఆర్ సినిమా దాదాపు ఖరారైంది. ఈ క్రమంలో తమిళ దర్శకులతో సినిమా చేస్తే ఫ్లాప్ అనే సెంటిమెంట్ కి.. ఇక శుభం కార్డు పడినట్లే అనే చర్చలు మొదలయ్యాయి. అదే జరిగి, ఈ నెగటివ్ సెంటిమెంట్ కూడా బ్రేక్ అయితే.. టాలీవుడ్ స్టార్స్ లో ఎన్టీఆర్ మరింత ప్రత్యేకంగా నిలుస్తాడు.
