కేవలం రెండు సినిమాలతో ఇండియాలోని టాప్‌ డైరెక్టర్స్‌ లిస్ట్‌ చేరిపోయారు సందీప్‌రెడ్డి వంగా. విజయ్‌ దేవరకొండ హీరోగా రూపొందిన ‘అర్జున్‌రెడ్డి’ చిత్రంతో ఒక్కసారిగా లైమ్‌లైట్‌లోకి వచ్చిన సందీప్‌.. ఆ సినిమాతో తెలుగు ప్రేక్షకుల్ని ఒక్క కుదుపు కుదిపారు. హీరో క్యారెక్టరైజేషన్‌ ఇలా కూడా ఉంటుందా, ఇలా కూడా సినిమా తియ్యొచ్చా అని చిత్ర పరిశ్రమ సైతం ఆశ్చర్యపోయింది. అదే సినిమాను హిందీలో ‘కబీర్‌ సింగ్‌’ పేరుతో రీమేక్‌ చేసి అక్కడ కూడా ఘనవిజయాన్ని అందుకున్నారు. ఇక 2023లో వచ్చిన ‘యానిమల్‌’ చిత్రంతో ప్రపంచ ప్రేక్షకుల దృష్టిలో పడ్డారు సందీప్‌. డైరెక్టర్‌గా ఇంతటి భారీ ఇమేజ్‌ని తెచ్చుకున్న సందీప్‌.. నెక్స్‌ట్‌ సినిమా ఎవరితో చేయబోతున్నారు అనే క్యూరియాసిటీ ప్రేక్షకుల్లో ఉండడం సహజం. వరస పాన్‌ ఇండియా సినిమాలతో పాన్‌ ఇండియా స్టార్‌గా పేరు తెచ్చుకున్న ప్రభాస్‌తో ‘స్పిరిట్‌’ అనే సినిమా చేయబోతున్నట్టు ప్రకటించారు. ఈ సినిమాలో ప్రభాస్‌ను మొదటి సారి ఒక పవర్‌ఫుల్‌ పోలీస్‌ ఆఫీసర్‌గా చూపించబోతున్నారు.
ప్రభాస్‌, సందీప్‌ కాంబినేషన్‌లో సినిమా రాబోతోందనే వార్త బయటికి రాగానే ప్రభాస్‌ ఫ్యాన్స్‌ ఎంతో ఆసక్తిగా ఆ సినిమా ఎప్పుడు స్టార్ట్‌ అవుతుంది అని ఎదురుచూస్తున్నారు. నిజానికి జనవరిలోనే ఈ సినిమా సెట్స్‌పైకి వెళ్లాల్సి ఉంది. కానీ, కొన్ని కారణాల వల్ల అది జరగలేదు. ఆ తర్వాత మే నెలలో ‘స్పిరిట్‌’ స్టార్ట్‌ అవుతుంది అనే వార్త ప్రభాస్‌ ఫ్యాన్స్‌ను నిరాశ పరిచింది. ఇదిలా ఉంటే.. తాజాగా ఈ సినిమా ప్రారంభంపై ఓ కొత్త న్యూస్‌ చక్కర్లు కొడుతోంది. మార్చిలో ఉగాది పర్వదినాన ఈ సినిమా పూజా కార్యక్రమాలతో ప్రారంభం కాబోతోందనేది ఆ వార్త. అయితే దీనికి సంబంధించిన అధికారిక ప్రకటన వస్తే తప్ప అది కూడా కన్‌ఫర్మ్‌ అని చెప్పలేం. ఏది ఏమైనా ప్రభాస్‌, సందీప్‌ సినిమా ఈ ఏడాది ప్రథమార్థంలోనే స్టార్ట్‌ అవుతుంది.
క్యారెక్టర్ల పరంగా చూస్తే సందీప్‌రెడ్డి ఇప్పటివరకు చేసిన రెండు సినిమాల్లో హీరో క్యారెక్టర్‌ ఒక దానితో ఒకటి సంబంధం లేనట్టుగా ఉంటుంది. ఒక విధంగా ఆయన సినిమాల్లో హీరోలు ఎక్స్‌ట్రీమ్‌గా బిహేవ్‌ చేస్తుంటారు. ప్రేమ అయినా, ఆవేశం అయినా అన్నీ హద్దు మీరి ఉంటాయి. ఇప్పుడు ప్రభాస్‌తో చేస్తున్న సినిమాలో హీరో ఓ పవర్‌ఫుల్‌ పోలీస్‌ ఆఫీసర్‌ అంటున్నారు. అలాంటి క్యారెక్టర్‌ని సందీప్‌ తన స్టైల్‌లో ఎలా క్రియేట్‌ చేసి ఉంటారు అనేది ఆసక్తికరంగా మారింది. క్యారెక్టరైజేషన్‌ ప్రభావంతో హీరో ఎంతో ఎనర్జిటిక్‌గా కనిపిస్తాడు. ఆ విషయంలో ప్రభాస్‌కి తిరుగులేదు అని చెప్పొచ్చు. అలాగే డైరెక్టర్‌కి ఏం కావాలి అనేది కూడా ప్రభాస్‌కి తెలుసు. అయితే దాన్ని రాబట్టుకునే టాలెంట్‌ డైరెక్టర్‌లో ఉండాలి. ఆ విషయంలో సందీప్‌రెడ్డికి సత్తా ఉంది అని అతని సినిమాలు ప్రూవ్‌ చేశాయి. ‘స్పిరిట్‌’ సినిమాకి సంబంధించి హీరో, డైరెక్టర్‌.. ఒకరిని మించి ఒకరు ఉన్నారు. అయితే ఎవరు, ఎవరిని డామినేట్‌ చేస్తారు అనేది తెలియాల్సి ఉంది. వీరిద్దరి ఇమేజ్‌లను బట్టి ‘స్పిరిట్‌’ విషయంలో ఇద్దరి మధ్య గట్టి పోటీ ఉంటుందనేది వాస్తవం.
