.WEBP)
మెగాస్టార్‌ చిరంజీవి, మల్లిడి వశిష్ట కాంబినేషన్‌లో ‘విశ్వంభర’ అనే పాన్‌ ఇండియా మూవీ రూపొందుతున్న విషయం తెలిసిందే. ఈ చిత్రం షూటింగ్‌ పూర్తి చేసుకొని ప్రస్తుతం పోస్ట్‌ ప్రొడక్షన్‌ వర్క్ జరుపుకుంటోంది. ఈ చిత్రాన్ని మే 9న సమ్మర్‌ స్పెషల్‌గా విడుదల చేయబోతున్నారు. ఇదిలా ఉంటే.. ఈ సినిమా తర్వాత శ్రీకాంత్‌ ఓదెల దర్శకత్వంలో ఓ సినిమా కన్‌ఫర్మ్‌ అయింది. అలాగే వరస సూపర్‌హిట్స్‌తో దూసుకెళ్తున్న అనిల్‌ రావిపూడితో ఓ సినిమా చేయబోతున్నట్టు ఇటీవల చిరంజీవి స్వయంగా ప్రకటించారు. వీటిలో అనిల్‌ రావిపూడి సినిమా మొదట ప్రారంభిస్తారని తెలుస్తోంది. ఈ సినిమా షూటింగ్‌ మే నుంచి ప్రారంభమవుతుందని సమాచారం. దీనికి ‘సంక్రాంతి అల్లుడు’ అనే టైటిల్‌ను దర్శకేంద్రుడు కె.రాఘవేంద్రరావు కన్‌ఫర్మ్‌ చేశారు.
విక్టరీ వెంకటేష్‌, అనిల్‌ రావిపూడి కాంబినేషన్‌లో రూపొందిన ‘సంక్రాంతికి వస్తున్నాం’ చిత్రం సంక్రాంతి కానుకగా విడుదలై భారీ విజయాన్ని నమోదు చేసుకున్న విషయం తెలిసిందే. శ్రీవెంకటేశ్వర క్రియేషన్స్‌ బేనర్‌పై దిల్‌రాజు నిర్మించిన ఈ చిత్రం ప్రాంతీయ సినిమాల్లో అత్యధిక కలెక్షన్స్‌ వసూలు చేసిన సినిమాగా రికార్డు సృష్టించింది. ఈ చిత్రం విజయోత్సవం ఇటీవల జరిగింది. ఈ కార్యక్రమానికి దర్శకేంద్రుడు కె.రాఘవేంద్రరావు ముఖ్యఅతిథిగా హాజరయ్యారు. ఈ వేడుకలో రాఘవేంద్రరావు పలు ఆసక్తికర వ్యాఖ్యలు చేశారు. భారీ విజయాన్ని అందుకున్న చిత్ర యూనిట్‌కి అభినందనలు తెలియజేశారు. అనిల్‌ రావిపూడిని ఉద్దేశించి మాట్లాడుతూ ‘నువ్వు సంక్రాంతి సీజన్‌ని వదిలిపెట్టొదు’ అని సలహా ఇచ్చారు. చిరంజీవితో అతను చేస్తున్న నెక్స్‌ట్‌ సినిమా గురించి మాట్లాడుతూ ‘సంక్రాంతికి వస్తున్నాం చిత్రంతో బ్లాక్‌బస్టర్‌ విజయాన్ని అందుకున్నావు కాబట్టి చిరంజీవితో చేస్తున్న సినిమాకి ‘సంక్రాంతి అల్లుడు’ అనే టైటిల్‌ పెడితే మరో సూపర్‌హిట్‌ సాధిస్తావు’ అని అనిల్‌ రావిపూడిని ఆశీర్వదించారు.
చిరంజీవి, అనిల్‌ రావిపూడి కాంబినేషన్‌లో రూపొందుతున్న సినిమా గురించి రాఘవేంద్రరావు చేసిన కామెంట్స్‌ ఇప్పుడు సోషల్‌ మీడియాలో వైరల్‌గా మారాయి. నెటిజన్లు ఈ సినిమా గురించి డిస్కస్‌ చేస్తున్నారు. షైన్‌ స్క్రీన్స్‌ పతాకంపై సాహు గారపాటితో కలిసి చిరంజీవి కుమార్తె సుస్మిత కొణిదెల ఈ చిత్రాన్ని నిర్మించనున్నారు. తన ప్రతి సినిమాలోనూ ఎంటర్‌టైన్‌మెంట్‌కి ఎక్కువ ప్రాధాన్యం ఇచ్చే అనిల్‌ రావిపూడి ఈ చిత్రాన్ని కూడా తన రెగ్యులర్‌ ఫార్మాట్‌లోనే రూపొందించనున్నారని తెలుస్తోంది. మాస్‌, యాక్షన్‌ హీరోగా మెగాస్టార్‌ చిరంజీవికి ఎంతో పేరు ఉన్నప్పటికీ కామెడీని పండించడంలో ఆయన స్టైలే వేరు అనే విషయాన్ని ఎన్నో సినిమాల ద్వారా ప్రూవ్‌ చేశారు. ఇక అనిల్‌ రావిపూడి చేసే సినిమాలో కామెడీ ఏ స్థాయిలో ఉంటుందో, పంచ్‌ డైలాగులు ఏ రేంజ్‌లో ఉంటాయో అందరికీ తెలిసిందే. మరి వీరిద్దరి కాంబినేషన్‌లో సినిమా అంటే ప్రేక్షకులకు, అభిమానులకు నవ్వుల పండగేనని ప్రత్యేకంగా చెప్పక్కర్లేదు. ప్రస్తుతం ఉన్న టాప్‌ డైరెక్టర్లలో వేగంగా సినిమాను పూర్తి చేయగల సత్తా ఉన్న డైరెక్టర్‌ అనిల్‌ రావిపూడి. మే నెలలో ప్రారంభం కానున్న ఈ చిత్రాన్ని సంక్రాంతికి విడుదల చేసి మరో సంక్రాంతి సూపర్‌హిట్‌ని అందుకునేందుకు అనిల్‌ రావిపూడి సిద్ధమవుతాడని చెప్పడంలో సందేహం లేదు.
