.WEBP)
సినిమా ఇండస్ట్రీలో నిలదొక్కుకోవాలని, హీరోగా మంచి పేరు తెచ్చుకొని ప్రేక్షకుల అభిమానాన్ని పొందాలని కోరుకునే ఎవరికైనా ప్రేక్షకుల అభిరుచిపైన గౌరవం, ఎలాంటి సినిమాలు కోరుకుంటున్నారు అనే విషయంలో ఒక అవగాహన ఉండాలి. ఈమధ్యకాలంలో ఒకటి, రెండు సినిమాలతో హీరోలుగా సక్సెస్‌ అయిన ఎంతో మందిలో ఆ లక్షణాలు కనిపించడం లేదని చెప్పాలి. ఒకప్పుడు హీరోలు ప్రేక్షకుల్ని దేవుళ్ళుగా భావించేవారు. వాళ్ళు లేకపోతే మనం లేము అనే భావనతో ఉండేవారు. కానీ, ఆ లక్షణం ఇప్పటి హీరోలలో లోపించింది. ఒకటి, రెండు హిట్స్‌ తర్వాత మనం ఏం చేసినా, ఎలాంటి సినిమాతో వచ్చినా ప్రేక్షకులు ఆదరిస్తారు అనే ఓవర్‌ కాన్ఫిడెన్స్‌ హీరోలలో పెరిగిపోతోంది. అయితే ఆ ధోరణి ఎప్పటికైనా ప్రమాదకరమే. ప్రేక్షకుల అభిరుచి ఏమిటి, తమ నుంచి వాళ్ళు ఏం కోరుకుంటున్నారు అనే విషయాన్ని హీరోలు లోతుగా ఆలోచించాల్సిన అవసరం ఉంది.
2017లో వెళ్లిపోమాకే చిత్రం ద్వారా హీరోగా ఎంట్రీ ఇచ్చిన విశ్వక్‌సేన్‌ ఈ విషయంలో ఎంతో కన్‌ఫ్యూజన్‌లో ఉన్నట్టు తెలుస్తోంది. ఆ సినిమా తర్వాత ఈ నగరానికి ఏమైంది వంటి విజయవంతమైన సినిమాలో నటించాడు. ఆ వెంటనే ఫలక్‌నుమా దాస్‌ అనే సినిమాలో పూర్తి మాస్‌ క్యారెక్టర్‌లో నటించడమే కాకుండా దర్శకత్వం కూడా వహించాడు. ఈ సినిమా మంచి విజయం సాధించడంతో ‘మాస్‌ కా దాస్‌’ అనే టైటిల్‌ను తన పేరు ముందు తగిలించుకున్నాడు. మాస్‌ మసాలా చిత్రంగా అదొక్కటే అతనికి సక్సెస్‌ నిచ్చింది. ఆ తర్వాత చేసిన అలాంటి సినిమాలు ఒక్కటి కూడా ప్రేక్షకుల్ని ఆకట్టుకోలేకపోయాయి. పాగల్‌, దాస్‌ కా ధమ్కి, గ్యాంగ్స్‌ అఫ్‌ గోదావరి, మెకానిక్‌ రాకీ వంటి సినిమాలు అతని ఎక్స్‌పెక్టేషన్స్‌ని రీచ్‌ కాలేకపోయాయి.
విశ్వక్‌ సేన్‌ ప్రేక్షకుల అభిమానాన్ని పొందడానికి ప్రధాన కారణం.. ఒక హీరోలా కాకుండా ఎంతో నేచురల్‌గా నటించడం, డైలాగుల్ని కూడా అంతే నేచురల్‌గా చెప్పడం. ఇవే అతన్ని ప్రేక్షకులకు దగ్గర చేశాయి. అయితే ఆ అభిమానాన్ని మాస్‌ సినిమాల వైపు మళ్లించే ప్రయత్నం చేశాడు విశ్వక్‌. కానీ, అలా చేసిన సినిమాల వల్ల సక్సెస్‌ అందుకోలేకపోయాడు. మాస్‌, యాక్షన్‌ హీరోలా తను కూడా డాన్సులు, ఫైట్స్‌ చేయగలను, అలాంటి సినిమాల ద్వారా ప్రేక్షకులకు మరింత దగ్గర కాగలను అనే ఓవర్‌ కాన్ఫిడెన్స్‌ వెనక్కి లాగేస్తోందనే విషయాన్ని అతను పసిగట్టలేకపోతున్నాడు. ఇప్పుడున్న టాప్‌ హీరోలంతా మాస్‌, యాక్షన్‌ సినిమాల ద్వారానే ఎదిగారు. ప్రతి హీరోకీ అలాంటి సినిమాలు, క్యారెక్టర్లు చెయ్యాలని వుంటుంది. అందులో తప్పేమీ లేదుగానీ అలాంటి క్యారెక్టర్లు వాటంతట అవే రావాలి తప్ప తనకు తాను క్రియేట్‌ చేసుకొని ముందుకెళ్తాను అంటే ఫలితం ఇలాగే ఉంటుంది.
విశ్వక్‌సేన్‌ని సక్సెస్‌ఫుల్‌ హీరోగా నిలబెట్టిన సినిమాలు ఈనగరానికి ఏమైంది, ఫలక్‌ నుమా దాస్‌, హిట్‌, గామి, అశోక వనంలో అర్జున కళ్యాణం. మిగతా సినిమాలన్నీ మాస్‌ హీరోగా ఎలివేట్‌ అవ్వాలని చేసినవే. అయితే ఆ సినిమాలు ప్రేక్షకుల్ని ఏమాత్రం ఆకట్టుకోలేకపోయాయి. అంతకుముందు విశ్వక్‌సేన్‌ సినిమాల కోసం ప్రేక్షకులు ఎదురుచూసేవారు. కానీ, నాలుగు పాటలు, నాలుగు ఫైట్లు అనే రొటీన్‌ ఫార్ములాతో సినిమాలు చేస్తుండడంతో వాటిపై ప్రేక్షకులు ఆసక్తి చూపించడం లేదు. తాజాగా విశ్వక్‌ నుంచి వచ్చిన విభిన్న చిత్రం లైలా. ఈ చిత్రం ప్రేక్షకుల్ని విపరీతంగా నిరాశపరిచింది. ఈ సినిమా ప్రీ రిలీజ్‌ ఫంక్షన్‌లో ఏర్పడిన వివాదం అందరికీ తెలిసిందే. దాన్ని సినిమా పబ్లిసిటీ కోసం వాడుకోవాలనే తాపత్రయం విశ్వక్‌లో కనిపించింది. వాస్తవానికి లైలా సినిమా ఎలా ఉంది, ప్రేక్షకుల్ని ఆకట్టుకుంటుందా లేదా అనే విషయంలో ఒక అవగాహన అతనికి ఉండే ఉంటుంది. కానీ, అది బయటపడకుండా సినిమాను ప్రమోట్‌ చేసుకునేందుకు రకరకాల ప్రయత్నాలు చేశారు. కాంట్రవర్సీలతో సినిమాలు ఆడతాయనే అపోహ నుంచి హీరోలు బయటపడితే మంచిది. ప్రేక్షకులకు నచ్చే కథలు, మెచ్చే అంశాలు సినిమాలో ఉంటే తప్పకుండా ఆదరిస్తారు అనడానికి ఎన్నో ఉదాహరణలు ఉన్నాయి. తమకి నచ్చిన సబ్జెక్ట్‌లు, బ్యాక్‌డ్రాప్‌ల గురించి ఆలోచించకుండా ఆడియన్స్‌ పల్స్‌ని కూడా పరిగణనలోకి తీసుకొని సినిమాలు చేస్తే సక్సెస్‌లు వాటంతట అవే వస్తాయి. కాబట్టి ఇప్పటికైనా విశ్వక్‌సేన్‌ ఆ దిశగా ఆలోచించి వైవిధ్యమైన కథాంశాలు ఎంపిక చేసుకుంటే మంచిది.
