.WEBP)
సినిమా తారలకు అభిమానులు ఉంటారు, వీరాభిమానులు ఉంటారు. అందులో అమ్మాయిలు ఆరాధించే హీరోలు అరుదుగా కనిపిస్తారు. అలాంటి వారిని వేళ్ళ మీద లెక్కించవచ్చు. కొందరు హీరోలకు ఎంత స్టార్‌డమ్‌ ఉన్నా అమ్మాయిల ఫాలోయింగ్‌ తక్కువగా ఉంటుంది. టాలీవుడ్‌కి వస్తే మహేష్‌బాబుకి లేడీ ఫ్యాన్‌ ఫాలోయింగ్‌ చాలా ఎక్కువ. ప్రేక్షకులే కాదు, కొందరు హీరోయిన్లు కూడా మహేష్‌ అంటే పడి చచ్చిపోతారు. అలా ఓ హీరోయిన్‌ తన ఐదేళ్ళ వయసులోనే ‘మహేష్‌ నా మొగుడు’ అని పెద్ద వాళ్లతో చెప్పి షాక్‌ ఇచ్చిందట. ఆ హీరోయిన్‌ పేరు నిహారిక. ఈమధ్యకాలంలో సోషల్‌ మీడియాలో రీల్స్‌ చేస్తూ సినిమాల్లోకి ఎంట్రీ ఇచ్చినవారు చాలా మంది ఉన్నారు. అలాంటి వారిలో నిహారిక ఎన్‌ఎం ఒకరు. ఇన్‌స్టాలో ఈమెకు 3 మిలియన్ల ఫాలోవర్స్‌ ఉన్నారు. గతంలో మహేష్‌, యష్‌ వంటి హీరోల సినిమాలకు ప్రమోషన్స్‌ చేసింది. సినిమా రిలీజ్‌కి ముందు నిహారికతో ఈ హీరోలు రీల్స్‌ చేస్తుండేవారు.
ఆ విధంగా పాపులర్‌ అయిన నిహారిక ఇప్పుడు హీరోయిన్‌ అయిపోయింది. తెలుగు, తమిళ సినిమాల్లో అవకాశాలు దక్కించుకుంటోంది. ఈమెకు మహేష్‌బాబు అంటే విపరీతమైన అభిమానం. ఒకరకంగా చెప్పాలంటే పిచ్చి. ఎప్పుడు సందర్భం వచ్చినా తన డ్రీమ్‌ బోయ్‌ గురించి ఊదరగొట్టేస్తుంది. తన ఇంటర్వ్యూల్లో ఈ విషయాన్ని ప్రస్తావించకుండా ఉండదు. సినిమా ప్రమోషన్స్‌లో భాగంగా మహేష్‌తో రీల్స్‌ చేసింది. వాటిని భద్రంగా దాచి పెట్టుకుంది. వీలు చిక్కినప్పుడల్లా వాటిని చూసి మురిసిపోతుందట. ఇటీవల నేషనల్‌ మీడియాకు ఇంటర్వ్యూ ఇచ్చింది నిహారిక. ఇంటర్వ్యూ చేసిన యాంకర్‌ తనకు మహేష్‌బాబు అంటే ఎంతో ఇష్టమని చెప్పడంతో నిహారిక అందుకొని నాన్‌స్టాప్‌గా మహేష్‌ గురించి చెప్పింది. మహేష్‌లాంటి వాడిని తను ఇంతవరకు చూడలేదని, ఎంతో అద్భుతంగా ఉంటాడని ఎమోషనల్‌ అయిపోయింది. తను ఐదేళ్ళ వయసులో ఉన్నప్పుడు మురారి చిత్రం చూసిందట. వెంటనే అతనే నా మొగుడు అని చెప్పిందట. అది విని వాళ్ళ పేరెంట్స్‌ షాక్‌ అయ్యారట. ఆ వయసులో అలాంటి మాట చెప్పడం అందర్నీ ఆశ్చర్యపరిచిందని, అయితే ఆ వయసులో ఆ ఫీలింగ్‌ ఏమిటో తనకు తెలియలేదని చెబుతోంది. అయినా ఇప్పటికీ తన క్రష్‌ మహేష్‌బాబేనని చెబుతోంది. అంతేకాదు, మహేష్‌ ఎవ్వరితోనూ రీల్స్‌ చెయ్యలేదని, తనతోనే రెండు రీల్స్‌ చేశాడని ఎంతో గర్వంగా చెప్పుకొని మురిసిపోతోంది నిహారిక.
