తారాగణం: బ్రహ్మాజీ, ఆమని, ధన్య బాలకృష్ణ, మని ఎగుర్ల, అవసరాల శ్రీనివాస్, రచ్చ రవి తదితరులు
సంగీతం: ఆర్ఆర్ ధృవన్
డీఓపీ: వాసు
ఎడిటర్: అనిల్
దర్శకత్వం: దయ
నిర్మాతలు: రాజు, భాను ప్రసాద్ రెడ్డి
బ్యానర్స్: కామ్రేడ్ ఫిల్మ్ ఫ్యాక్టరీ, అథీరా ప్రొడక్షన్స్
విడుదల తేదీ: ఫిబ్రవరి 21, 2025
బలగం సుధాకర్ రెడ్డి టైటిల్ రోల్ పోషించిన చిత్రం బాపు. బ్రహ్మాజీ, ఆమని, ధన్య బాలకృష్ణ, మని ఎగుర్ల ప్రధాన పాత్రలు పోషించారు. తెలంగాణ నేపథ్యంలో రూపొందిన ఈ చిత్రానికి దయ దర్శకత్వం వహించారు. ప్రచార చిత్రాలతో బలగం సినిమాని గుర్తుచేసిన బాపు.. తాజాగా ప్రేక్షకుల ముందుకు వచ్చింది. మరి ఈ సినిమా ఎలా ఉంది? బలగం స్థాయిలో మెప్పించిందా లేదా? అనేది రివ్యూలో తెలుసుకుందాం. (Baapu Movie Review)
కథ:
మల్లయ్య (బ్రహ్మాజీ) ఒక బీద రైతు. పండించిన పంట చేతికి రాక అప్పుల పాలవుతాడు. అప్పులు తీర్చకపోతే పొలాన్ని జప్తు చేస్తామని అప్పులిచ్చిన వాళ్లు బెదిరిస్తారు. దాంతో తాను ఆత్మహత్య చేసుకుంటే.. ప్రభుత్వం నుండి రూ.5 లక్షల పరిహారం వస్తుందని, కుటుంబ కష్టాలు తీరతాయని మలయ్య భావిస్తాడు. కానీ అతని నిర్ణయానికి భార్య సరోజ(ఆమని) అడ్డు చెబుతుంది. కావాలంటే ఆ డబ్బు కోసం ఇంటి పెద్ద అయినటువంటి మల్లయ్య తండ్రి రాజయ్య(బలగం సుధాకర్ రెడ్డి)ని చంపేస్తే మంచింది కదా అని సలహా ఇస్తుంది. ఆ తర్వాత ఏం జరిగింది? కొడుకు కోసం రాజయ్య ప్రాణ త్యాగానికి సిద్ధపడ్డాడా? మల్లయ్య అప్పుల నుంచి బయటపడ్డాడా? చివరికి ఏం జరిగింది? అనేది సినిమా చూసి తెలుసుకోవాలి.
విశ్లేషణ:
రైతుల ఆత్మహత్యల నేపథ్యంలో ఈ కథ రాసుకున్నారు. అలా అని కథ సీరియస్ గా సాగదు. డార్క్ కామెడీతో నడుస్తుంది. ఈ సినిమాని మొదటి నుంచి బలగంతో పోలుస్తున్నారు. నిజానికి ఈ రెండు కథలు చావు చుట్టూనే తిరుగుతాయి. బలగంలో ఒక మనిషి చనిపోతే.. ఆ కుటుంబంలో ఉన్న మనుషుల పంతాలను, స్వార్థాలను చూపించారు. కానీ బాపులో అలా కాదు. ఇంటి పెద్ద చావు కోసం కొడుకుతో సహా అందరూ ఎదురు చూస్తారు. ఆస్తి కోసం కన్న తండ్రిని కొడుకు చంపాడు వంటి వార్తలు అప్పుడప్పుడు చూస్తుంటే ఉంటాం. అయినప్పటికీ ఎందుకనో సినిమా చూస్తున్నప్పుడు ఆ కథను తీసుకోవడానికి మనసుకి కాస్త కష్టంగానే ఉంటుంది. సమాజంలో ఇలాంటి మనుషులు కొందరు ఉన్నారని సర్ది చెప్పుకోగలిగితేనే.. ఈ సినిమాని చూడగలం. ఈ చిత్రాన్ని ఎమోషన్స్, కామెడీ మేళవింపుతో నడిపించాలని దర్శకుడు ప్రయత్నించాడు. ఎమోషన్స్ అంతగా వర్కౌట్ కాలేదు కానీ, కామెడీ బాగానే పండింది. ఇక మధ్యలో మల్లయ్య పిల్లల ప్రేమ కథలు ఇరికించినట్లుగా ఉన్నాయి. నిడివి తక్కువైనప్పటికీ కథనం నెమ్మదిగా సాగినట్లు అనిపించింది అంటే ఆ ప్రేమ కథల వల్లనే అని చెప్పవచ్చు. క్లైమాక్స్ కూడా అందరినీ సంతృత్తి పరచకపోవచ్చు.
నటీనటులు, సాంకేతిక నిపుణుల పనితీరు:
పేద రైతు మల్లయ్య పాత్రలో బ్రహ్మాజీ చక్కగా ఒదిగిపోయారు. ఎమోషనల్ సన్నివేశాల్లో ఆకట్టుకున్నారు. ఆమని తన ఇమేజ్ కి భిన్నంగా చేసిన సరోజ పాత్రలో మెప్పించారు. ఇక టైటిల్ రోల్ లో సుధాకర్ రెడ్డి తన సహజ నటనతో అలరించారు. ధన్య బాలకృష్ణ, మని ఎగుర్ల, అవసరాల శ్రీనివాస్, రచ్చ రవి తదితరులు పాత్రల పరిధి మేరకు నటించారు.
సాంకేతికంగా బాపు బాగానే ఉంది. డీఓపీ వాసు తెలంగాణ వాతావరణాన్ని తెరపై ఎంతో సహజంగా చూపించారు. ఆర్ఆర్ ధృవన్ సంగీతం కథకు తగ్గట్టుగా ఉంది. ఎడిటర్ పనితీరు బాగుంది. నిర్మాణ విలువలు సినిమా స్థాయికి తగ్గట్టుగా ఉన్నాయి.
ఫైనల్ గా..
బాపు.. ఎమోషన్స్ తో గుండెల్ని పిండేయలేదు కానీ, బాగానే నవ్వించాడు.
రేటింగ్: 2.5/5
