తారాగణం: ధనరాజ్, సముద్రఖని, హరీశ్‌ ఉత్తమన్‌, ప్రమోదిని, సత్య, సునీల్, మోక్ష, పృథ్వీ తదితరులు
సంగీతం: అరుణ్ చిలువేరు
డీఓపీ: దుర్గాప్రసాద్
ఎడిటర్: మార్తండ్ కె వెంకటేశ్
రచన: శివప్రసాద్ యానాల
దర్శకత్వం: ధనరాజ్
నిర్మాత: పృథ్వీ పోలవరపు
బ్యానర్: స్లేట్ పెన్సిల్ స్టోరీస్
విడుదల తేదీ: ఫిబ్రవరి 21, 2025
కమెడియన్ ధనరాజ్, ప్రముఖ నటుడు సముద్రఖని ప్రధాన పాత్రలు పోషించిన చిత్రం ‘రామం రాఘవం’. ఈ సినిమాతో ధనరాజ్ దర్శకుడిగా మారడం విశేషం. కమెడియన్ వేణు ‘బలగం’తో దర్శకుడిగా మారి మెప్పించాడు. మరి ధనరాజ్ కూడా దర్శకుడిగా సత్తా చాటాడా లేదా? అనేది రివ్యూలో తెలుసుకుందాం. (Ramam Raghavam Movie Review)
కథ:
రామం(సముద్రఖని) ప్రభుత్వ ఉద్యోగి. నీతి, నిజాయితీకి పెట్టింది పేరు. రామం కొడుకు రాఘవ(ధనరాజ్) మాత్రం అందుకు పూర్తి భిన్నం. బాధ్యత లేకుండా తిరుగుతూ, చెడు వ్యసనాలకు బానిస అవుతాడు. కొడుకంటే ఎంతో ప్రేమ ఉన్న రామం.. అతన్ని దారిలోకి తెచ్చుకోవడానికి ప్రయత్నిస్తుంటాడు. కానీ అవేవీ ఫలించవు. పైగా తండ్రినే చంపాలని రాఘవ నిర్ణయం తీసుకుంటాడు. అసలు కన్న తండ్రిని చంపాలని రాఘవ ఎందుకు అనుకున్నాడు? ఆ విషయం తెలిసి రామం ఏం చేశాడు? తండ్రి ప్రేమను రాఘవ అర్థం చేసుకోగలిగాడా? చివరికి ఏం జరిగింది? అనేది సినిమా చూసి తెలుసుకోవాలి.
విశ్లేషణ:
రాముడు లాంటి తండ్రికి రావణుడు లాంటి కొడుకు పుడితే ఎలా ఉంటుంది అనే ఆలోచన నుంచి ఈ కథ పుట్టినట్టుంది. అల్లారుముద్దుగా పెంచిన తండ్రిని చంపడానికి కొడుకు సిద్ధమవ్వడం, ఆ విషయం తండ్రికి తెలియడం.. అనే పాయింట్ చుట్టూ కథని అల్లుకోవడం ఆసక్తికరంగా ఉంది. ఇలాంటి కథలకు.. కథనం, భావోద్వేగాలు కీలకం. ఓ వైపు తండ్రిని కొడుకు నిజంగా చంపుతాడా? అనే ఉత్కంఠను కలిగిస్తూనే.. మరోవైపు చంపకుండా ఉంటే బాగుండు అనే ఎమోషన్ ప్రేక్షకుల్లో కలిగేలా చేయాలి. ఆ విషయంలో ‘రామం రాఘవం’ టీం చాలా వరకు విజయం సాధించింది. ఫస్ట్ హాఫ్ లో రామం, రాఘవ పాత్రలను ఎస్టాబ్లిష్ చేయడానికి కాస్త ఎక్కువ సమయమే తీసుకున్నారు. ఈ క్రమంలో కొన్ని సీన్లు రిపీటెడ్ గా అనిపిస్తాయి. తండ్రి, కొడుకుల మధ్య దూరం ఏర్పడే సన్నివేశాలను మరింత బలంగా రాసుకొని ఉండాల్సింది. ఇంటర్వెల్ బ్యాంగ్ మెప్పించింది. సెకండ్ హాఫ్ లో ఏం జరగనుందనే ఆసక్తిని రేకెత్తించేలా ఇంటర్వెల్ ఉంది. రాఘవ పాత్ర, ఆ పాత్ర చుట్టూ అల్లుకున్న సన్నివేశాలతో.. సెకండ్ హాఫ్ ని ఆసక్తికరంగా మలిచారు. పతాక సన్నివేశాలు మెప్పించాయి. కన్న వారి ప్రేమను అర్థం చేసుకోకుండా, బాధ్యత లేకుండా తిరుగుతూ, మూర్ఖంగా ప్రవర్తించే పిల్లలలో ఆలోచన రేకెత్తించేలా ఈ చిత్రం ఉంది.
నటీనటులు, సాంకేతిక నిపుణుల పనితీరు:
రామం పాత్రలో సముద్రఖని చక్కగా ఒదిగిపోయారు. ఆ పాత్రకు నూటికి నూరు శాతం న్యాయం చేశారు. ముఖ్యంగా ఎమోషనల్ సన్నివేశాల్లో కట్టిపడేశారు. నెగటివ్ షేడ్స్ ఉన్న బాధ్యత లేని కొడుకు పాత్రలో ధనరాజ్ నటన ఆకట్టుకుంది. హరీశ్‌ ఉత్తమన్‌ ఉన్నంతలో మంచి ప్రభావం చూపాడు. ప్రమోదిని, సత్య, సునీల్, మోక్ష, పృథ్వీ తదితరులు పాత్రల పరిధి మేరకు నటించారు.
మొదటి సినిమా అయినప్పటికీ దర్శకుడిగా ధనరాజ్ కి మంచి మార్కులే పడతాయి. నటీనటుల నుంచి మంచి నటనను రాబట్టుకోవడంతో పాటు, సాంకేతిక విభాగాల నుంచి కూడా మంచి అవుట్ పుట్ రాబట్టుకోగలిగాడు. కథని ఓన్ చేసుకొని, దానిని తెర మీదకు నిజాయితీగా తీసుకొచ్చాడు. అరుణ్ సంగీతం, దుర్గా ప్రసాద్ కెమెరా పనితనం బాగున్నాయి. ఎడిటింగ్ పరవాలేదు. సంభాషణలు బాగున్నాయి. నిర్మాణ విలువలు సినిమా స్థాయికి తగ్గట్టుగా ఉన్నాయి.
ఫైనల్ గా..
రామం రాఘవం.. మంచి ప్రయత్నం.. ఈ తరం యువతకి మంచి సందేశాన్ని ఇచ్చే చిత్రం.
రేటింగ్: 2.5/5
