.WEBP)
తమిళ్‌ స్టార్ హీరో అజిత్‌కి యాక్టింగ్‌తోపాటు రేసులపై కూడా ఆసక్తి ఉన్న విషయం తెలిసిందే. వీలు కుదిరినప్పుడల్లా కార్‌ రేసుల్లో, బైక్‌ రేసుల్లో పాల్గొంటాడు. ప్రస్తుతం సినిమాలు చేస్తూనే రేసుల్లో పార్టిసిపేట్‌ చేస్తున్నాడు. వివిధ దేశాల్లో జరుగుతున్న కార్‌ రేసుల్లో తన సత్తా చూపిస్తూ ముందుకు వెళుతున్నాడు. ఇదిలా ఉంటే.. ఈమధ్యకాలంలో అజిత్‌ను ప్రమాదాలు వెంటాడుతున్నాయి. ఇటీవల దుబాయ్‌, పోర్చుగల్‌లలో ప్రాక్టీస్‌ చేస్తున్న సమయంలో అజిత్‌ కారు ప్రమాదాలకు గురైంది. అయితే ఈ ప్రమాదాల్లో ఎలాంటి గాయాలు లేకుండా అజిత్‌ బయట పడడం విశేషం.
తాజాగా అజిత్‌ మరో ప్రమాదానికి గురైనట్టు తెలుస్తోంది. ఒకవిధంగా అజిత్‌కు ప్రమాదాలు అనేవి అలవాటుగా మారిపోయినట్టు కనిపిస్తోంది. స్పెయిన్‌లోని వాలెన్సియాలో జరుగుతున్న పోర్షే స్ప్రింట్‌ ఛాలెంజ్‌ రేసులో పాల్గొన్నారు అజిత్‌. రేస్‌లో భాగంగా తన ముందు వెళుతున్న కారును ఢీ కొట్టిన అజిత్‌ కారు గాల్లోకి రెండు పల్టీలు కొట్టింది. అయితే ఈసారి కూడా అజిత్‌కు ఎలాంటి గాయాలు కాకపోవడం విశేషం. అజిత్‌ కారు యాక్సిడెంట్‌కు సంబంధించిన వీడియో సోషల్‌ మీడియాలో వైరల్‌గా మారింది. ఈ వీడియో చూసిన తర్వాత అభిమానులు టెన్షన్‌ పడ్డారు. అయితే అజిత్‌ క్షేమంగా బయట పడిన విషయం తెలుసుకొని ఊపిరి పీల్చుకున్నారు.
