నటసింహం నందమూరి బాలకృష్ణ (Nandamuri Balakrishna) తన 109వ సినిమాని బాబీ కొల్లి దర్శకత్వంలో చేస్తున్న సంగతి తెలిసిందే. ‘NBK 109’ అనే వర్కింగ్ టైటిల్ తో ఈ చిత్రం రూపొందుతోంది. ‘అఖండ’, ‘వీరసింహ రెడ్డి’, ‘భగవంత్ కేసరి’ వంటి హ్యాట్రిక్ హిట్స్ తర్వాత బాలయ్య నటిస్తున్న సినిమా కావడంతో ‘NBK 109’పై భారీ అంచనాలున్నాయి. ఇప్పటికే విడుదలైన ఫస్ట్ గ్లింప్స్, బాలకృష్ణ బర్త్ డే గ్లింప్స్ ఆకట్టుకొని.. సినిమాపై అంచనాలను రెట్టింపు చేశాయి. ఇక ఇప్పుడు ఈ సినిమా నుంచి మరో అదిరిపోయే అప్డేట్ వచ్చింది.
‘NBK 109’ అప్డేట్ ని ట్విట్టర్(ఎక్స్) వేదికగా డైరెక్టర్ బాబీ పంచుకున్నారు. బాలయ్యతో దిగిన ఫొటోని షేర్ చేసిన ఆయన.. జైపూర్ లో బాలకృష్ణ గారితో #NBK109 మోస్ట్ ఇంటెన్స్ షెడ్యూల్ పూర్తి చేశామని తెలిపారు. ఈ ఎలక్ట్రిఫైయింగ్ సీక్వెన్స్ లలో బాలకృష్ణ గారి అసమాన ఎనర్జీని చూడటానికి సిద్ధంగా ఉండండని బాబీ పేర్కొన్నారు. అలాగే టైటిల్ టీజర్ ని త్వరలోనే విడుదల చేయనున్నట్లు చెప్పి బాలయ్య ఫ్యాన్స్ కి మరింత కిక్ ఇచ్చారు. కాగా ఈ సినిమాకి ‘వీరమాస్’ అనే టైటిల్ లాక్ చేసినట్లు గతంలో ప్రచారం జరిగింది.
ఫార్చూన్ ఫోర్ సినిమాస్ తో కలిసి సితార ఎంటర్టైన్మెంట్స్ నిర్మిస్తున్న ఈ యాక్షన్ ఫిల్మ్ లో బాబీ డియోల్ విలన్ గా నటిస్తున్నాడు. ఈ చిత్రానికి థమన్ సంగీతం అందిస్తుండగా, ‘జైలర్’ ఫేమ్ విజయ్ కార్తీక్ సినిమాటోగ్రఫీ అందిస్తున్నాడు. ఎడిటర్ గా నిరంజన్, ప్రొడక్షన్ డిజైనర్ గా అవినాష్ కొల్లా వ్యవహరిస్తున్నారు.
