ప్రస్తుతం థియేటర్లలో గత గురువారం విడుదలైన సరిపోదా శనివారం సందడి నెలకొంది. భారీ వర్షాలలో కూడా ఈ సినిమా మంచి వసూళ్లతో దూసుకుపోతోంది. ఇక ఈ వారం కూడా పలు సినిమాలు బాక్సాఫీస్ దగ్గర తమ అదృష్టాన్ని పరీక్షించుకోబోతున్నాయి.
కోలీవుడ్ స్టార్ విజయ్ దళపతి హీరోగా వెంకట్ ప్రభు దర్శకత్వంలో రూపొందిన సినిమా ది గ్రేటెస్ట్ ఆఫ్ ఆల్ టైమ్ (The GOAT). ఏజీఎస్ ఎంటర్టైన్మెంట్ నిర్మించిన ఈ యాక్షన్ థ్రిల్లర్ సెప్టెంబర్ 5న విడుదల కానుంది. ప్రచార చిత్రాలకు మిశ్రమ స్పందన వచ్చినప్పటికీ, అడ్వాన్స్ బుకింగ్స్ కి మాత్రం మంచి స్పందన వస్తోంది. మరి రిజల్ట్ ఏమవుతుందో చూడాలి.
నివేదా థామస్ ప్రధాన పాత్ర పోషించిన చిత్రం ’35 చిన్న కథ కాదు’ (35 Chinna Katha Kaadu). నందకిషోర్ ఈమని దర్శకత్వం వహించారు. రానా దగ్గుబాటి సమర్పణలో సృజన్ ఎర్రబోలు, సిద్ధార్థ్‌ రాళ్లపల్లి నిర్మించారు. ప్రచార చిత్రాలతో ఆకట్టుకున్న ఈ ఫ్యామిలీ డ్రామా.. సెప్టెంబర్ 6న విడుదలవుతోంది. ఈ సినిమా బాక్సాఫీస్ దగ్గర ఎలాంటి మ్యాజిక్ చేస్తుందో చూడాలి.
సుహాస్, సంగీర్తన జంటగా సందీప్ రెడ్డి బండ్ల దర్శకత్వంలో రూపొందించిన చిత్రం ‘జనక అయితే గనక’ (Janaka Aithe Ganaka). దిల్ రాజు ప్రొడక్షన్స్ నిర్మించిన ఫ్యామిలీ ఎంటర్టైనర్ సెప్టెంబర్ 7న రిలీజ్ అవుతుంది. హీరోగా తన మార్క్ చూపిస్తున్న సుహాస్.. ఈ సినిమాతోనూ మెప్పించేలా ఉన్నాడు.
