40 లక్షల మందికి లబ్ది
అర్హతగల చివరి వ్యక్తి వరకూ రేషన్ కార్డు అందిస్తామని మంత్రి ఉత్తమ్ కుమార్ రెడ్డి తెలిపారు. పదేళ్ల బీఆర్ఎస్ పాలనలో 40,000 మందికి మాత్రమే రేషన్ కార్డులు అందించారని విమర్శించారు. కాంగ్రెస్ సర్కార్ 40 లక్షల మందికి లబ్ధిచేకూరేలా కొత్త రేషన్ కార్డుల మంజూరు విధానంలో మార్పులు చేసి అర్హులందరికీ కార్డులు అందిస్తున్నామన్నారు. రేషన్ కార్డుల ద్వారా ప్రజలకు ఆరు కిలోల సన్నబియ్యం ఉచితంగా ఇవ్వనున్నట్లు ప్రకటించారు. అదేవిధంగా అర్హులందరికీ ఇందిరమ్మ ఇళ్లు మంజూరు చేస్తామన్నారు. వ్యవసాయయోగ్యమైన భూములకు ఏడాదికి రూ.12 వేలు పెట్టుబడి సాయం, భూమిలేని వ్యవసాయ కూలీలకు ఏడాదికి రూ.12 వేలు ఆర్థికసాయం చేయనున్నట్లు తెలిపారు.
